BUNDIUM vel BURNUM

BUNDIUM, vel BURNUM

Hunc locum in Aquitania Normannorum latrocinia nobilitârunt. De Nordmannia 13. piraticae naves egressae, tandem in Aquitanico litore prosperis usae successibus, vicô quôdam, qui vocatur Bundium (alias Buin) ad integrum depopulatâ, cum ingenti praeda ad propria reversae sunt: ut scribit Eginhardus in rebus anni 820. Quem vicum Bundium in Aquitanico litore vocat, Eginhardus in Annalibus, eundem vicum Buin nuncupatum reperio in Vita Imperatoris Ludovici Pii. Annô 820. Naves 13. piraticae a Nortmannia in Aquitaniam sese verterunt: et vastatô vicô, Cuius vocabulum Buin, multâque oneratae praedâ, reversae sunt. In Chronico de Gestis Nortmannorum, quod Andreas Chesnius tomô 2. Historiae Francicae scriptorum inseruit, nuncupatur vicus Burnad. Northmanni in Aquitanico litore prosperis usi successibus, vicô Burnad depopulatô, cum ingenti praeda reversi sunt ad propria. Ubi legendum videtur, vicô Burn ad integrum depopulatô. Haec einim ex Eginhardi Annalibus sunt desumpta, et ad verbum fere transscripta. Certe in Annalibus Bertinianis ita scriptum reperio: De Nortmannia 13. piraticae naves egressae, tandem in Aquit. litore prosperis usae successibus, vicô quôdam, qui vocatur Burnad integrum depopulatô, cum ingenti praeda ad propria reversae sunt. Nemo non videt ibi esse emendandum, vicô quôdam, qui vocatur Burn, ad integrum depopulatô: uti legitur scriptum in Chronico S. Arnulfi, quod Annales Mettenses appellant. Ac forsitan et apud Eginhardum et in Vita Ludovici Pii nomen vici emendari convenit, et Buin in Burn mutari. Quippe vulgo etiamnum vocatur Born, vel S. Paul de Born, nomenque dedit Praepositurae Burnensi, la Prevoste de Born. Vetus iste vicus Burnensis positus est in Medulis trans Garumnam, inter duos fluviolos stagnum maritimum, Oceani aestu augeri solitum, ingredientes. Vales. Notit. Gall.